ויהי ממחרת: לענגערע מעסעדזש פונעם וויצע פרעזידענט איבער די נעכטיגע דערשטיקנדע צונאמי אויף רעפובליקאנע
איינע פון די זאכן וואס אונזערע דאטא עקספערטן האבן זיך כסדר פארנומען דערמיט איז געווען די "קאמפאזישן" – דאס הייסט, צי דער צוזאמענשטעל פון די וויילער זעט אויס גענוג ענליך צו 2024 אז די רעפובליקאנער זאלן קענען געווינען. טראץ דעם וואס די אנקעטעס האבן פאראויסגעזאגט א דעמאקראטישע לענדסלייד, האבן די ציפערן אונז כסדר געוויזן די זעלבע זאך: אין געוויסע שטאטן איז די טורנאויט געווען סתם אקעי, אין אנדערע איז עס געווען ממש געוואלדיג, אבער אין קיין שום שטאט איז עס נישט געווען קיין קאטאסטראפע. ביי אונז איז געווען אן אמת'ע אפטימיזם, ווייל אונזערע מענטשן זענען טאקע ארויסגעקומען שטימען.
איך האב געפרעגט דעם קלוגסטן דאטא מומחה וואס איך קען, צי דאס מיינט אז מיר גייען שאקירן די וועלט. "ניין," האט ער מיר געזאגט. "מיר קענען טאקע טון בעסער ווי די אנקעטעס זאגן, אבער די דאטא זאגט אונז אז אסאך טראמפ-ווענס 2024 וויילער זענען זייער בייז און פלאנירן צו שטימען פאר די אנדערע זייט. אונזערע וויילער קומען טאקע ארויס, אבער זיי וועלן מעגליך נישט שטימען פאר אונז."
יעצט זעט מען טאקע אז דאס איז געווען ממש ווי א נביאות. אונזערע וויילער זענען טאקע ארויסגעקומען. אין פלארידע, למשל, זענען די וויילער געווען מיט 9 פונקטן מער רעפובליקאנער ווי דעמאקראטן, נאר מיט אביסל ווייניגער ווי אין 2024. ס'איז נישטא קיין ספק אז ס'זענען געווען פלעצער וואו מיר האבן געקענט טון בעסער מיט'ן ארויסברענגען דעם עולם צו די פאולס. אבער די הויפט פראבלעם איז נישט די טורנאויט; די עיקר שאלה און פראבלעם איז אז אסאך מענטשן וואס האבן געשטימט פאר טראמפ און ווענס אין 2024, האבן יעצט אין 2026 געשטימט פאר די דעמאקראטן.
מ'גייט זיך יעצט אסאך ארומרייסן און טענה'ן איבער וואס ס'האט פאסירט און פארוואס ס'איז אזוי געשען. איינער פון די פאולסטערס וואס איך האב באמת רעספעקט פאר אים, האט מיר געזאגט אז אונזערע מעסעדזשעס איבער די עקאנאמיע זענען נישט געווען גענוג שארף אין די לעצטע וואכן פון דעם קאמפיין. ס'איז כמעט זיכער אז ער איז גערעכט.
אבער די אמת'ע סיבה פארוואס מיר האבן פארלוירן איז למעשה קלאר פאר כמעט יעדן איינעם.
נאך א פאולסטער – איינער פון די קליגסטע קעפ וואס איך קען אין די פאליטישע וועלט – האט מיר נעכטן געזאגט אז מיר גייען פארלירן דעם "דזשענעריק באלאט" מיט גאנצע 13 פונקטן. כאטש איך בין אריינגעגאנגען צו די וואלן דינסטאג מיט א שוואכע האפענונג, בין איך פונדעסטוועגן געווען שאקירט צו הערן אזא נומער. אין זיינע אנקעטעס האט ער געזען אז פילע טראמפ-וויילער פון 2024 זענען געווען אויפגעברויזט און האבן פלאנירט צו שטימען פאר די דעמאקראטן. ער האט געפרעגט די וויילער וואס האבן אונז פארלאזט, וואס וואלט זיי געמאכט צוריקקומען צו אונזער זייט? די פיר הויפט תשובות, וואס האבן אויסגעמאכט כמעט אלע רעספאנסעס, זענען געווען:
ענדיגן די מלחמה.
זיך קאנצענטרירן אויף די קאסט-אוו-ליווינג און אינפלאציע.
שטעלן "אמעריקע ערשט".
טוישן אונזערע באציאונגען מיט מדינת ישראל.
אונזערע וויילער זענען טאקע ארויסגעקומען שטימען, אבער די אויבנדערמאנטע פיר נקודות זענען די סיבה פארוואס פילע פון זיי האבן ענדליך געשטימט פאר די דעמאקראטן. די אינפארמאציע קומט פון א פאולסטער וואס האט פונקטליך צוגעטראפן די עכטע רעזולטאטן. בשעת פילע מענטשן האבן דעם פארגאנגענעם מאנטאג אטאקירט רחל קעמפאס-דאפי פארן פארלאנגען א דיפלאמאטישע לעזונג צו דעם קאנפליקט, שטעלט זיך ארויס אז איר פאליטישע עצה איז געווען גאר שטארק און ריכטיג. (זי איז אגב א וואוילע פערזאן.)
אין די קומענדיגע פאר חדשים גייען מיר מיטמאכן א שווערע צייט פון "געזלייטינג" און מ'גייט אונז פרובירן צו פארדרייען דעם קאפ. גרייט אייך צו הערן ווי אן א שיעור "עסטעבלישמענט" פאליטיקאנטן טענה'ן אז "אמנעסטי" איז די איינציגסטע ישועה פאר אונזערע צרות. איך בין טאקע גרייט צו הערן איבער טוישן די וועג וויאזוי מיר אינפארסירן די געזעצן – למשל, זיך מער קאנצענטרירן אויף די ביזנעסער וואס נעמען אויף אומלעגאלע ארבעטער – אבער יעדער וואס פראמאוט אמנעסטי זאגט אייך פשוט ליגענט אין פנים אריין.
דער אמת'ע סיבה פארוואס מיר האבן פארלוירן איז צוליב די מלחמה. דער פרעזידענט אליין האט דאס קלאר געזאגט נעכטן נאכט. אויב ווילט איר טענה'ן אז עס האט זיך אויסגעצאלט – אז פארלירן דעם סענאט פאר די קומענדיגע זעקס יאר איז געווען א פרייז וואס לוינט זיך צו צאלן – דעמאלטס זייט מוחל און מאכט די טענה אפן. צי מען שטימט יא צו צי נישט, אבער כאטש וואלט דאס געווען אן ערנסטע און אמת'ע טענה. אבער יעדער ווייסט גאנץ גוט פארוואס מיר האבן פארלוירן, און יעדע אמת'ע שמועס איבער וואו מיר גייען פון דא ווייטער מוז זיך אנהייבן ביי דעם פונקט.
איך בלייב נאך אלץ האפענונגספול פאר אונזער לאנד. פאר די מענטשן וואס זענען בייז און ווילן שרייען "איך האב אייך דאך געזאגט": איר זענט גערעכט, איר האט טאקע געזאגט. נעמט די אלע כוחות און נוצט עס אויס צו ערוויילן רעפובליקאנער וואס האבן די זעלבע שיטה און וועלט-בליק ווי אייך. און פאר די וואס זענען פשוט אויסער זיך פאר כעס איבער די רעזולטאטן, איר האט אלע רעכט צו זיין בייז. לאמיר נעמען דעם כעס און צוריקגיין צו די ארבעט צו ראטעווען אונזער לאנד.
